DETZ DE JUNH, PRIMIERA SERADA
"Serada", disètz ? Que non pas ! La jornada tota, e plan plena !
Que tre nòu oras del matin, venguts de Clairvaux, Baraqueville, la Primaube o Cassagnes-Bégonhès... mai d'un centenat d'enfants, dempuèi lo cors preparatòri fins al colègi, envasiguèron pacificament lo nòstre Ostal. Sièis visitas d'arreu per tot aquel mond ! Dins un rambalh plasent, plan bailejat pels mèstres (òsca per eles !), tot aquò nos valguèt un bèl moment de descubèrta, de suspresa e de comunion.
En mai d'aquò, totes aqueles "crespinats" (lo mot pòt pas tombar melhor...) poguèron assistir a la presentacion, per la Comedia dell'Òc de Bernat Cauhapé, del conte bodonenc l'Enfant Polit. Una representacion lo matin, una autra la prangièra... e una brava capitada ! D'enfants meravilhats, e de mèstres embelinats ! Un brave mercé al Bernat, a Myriam Petiot, la seuna Draquessa, e a totes los que los ajudèron dins una jornada tan pesuga.
Perqué s'acabèt pas amb la partença dels escolars. Calguèt montar sus l'empont un còp de mai, lo ser, per un autre public encara. Mas los publics pòdon cambiar, la qualitat cambièt pas gaire, e Drac e Draquessa, tornamai, mirgalhèron.
Ives Durand venguèt, en primièra partida, nos contar doas istòrias de Joan Bodon (lo Pepin dins la luna, e l'Aucèl gris) amb un umor mesclat d'esmoguda que faguèt l'unanimitat. Un bèl mercé a tu, contaire !
E un darrièr, enfin, a la municipalitat de Crespinh, que nos permetèt d'abrigar de moments tan dolces dins la sala comuna, de paur que lo cèl d'aqueste falord mes de junh nos tombe sul cap !
L'Ostal e Joan Bodon vos mercejan a totes, que per vosautres, vòstre trabalh e vòstre engenh, la primièra serada de l'Ostal foguèt un encantament.
Lo Drac,
la Draquessa...
... e l'Enfant Polit.
Ives Durand, contaire talentós
Coma una ardada prèsta a l'envòl, en esperar de dintrar dins l'Ostal !
Lo caval per primièr contacte...
... fins al cap e cap del larièr.